08-Jun-2021
Ka HYC Mawlai circle mynta ka janmiet 7/6/2021 hapoh ka jingialam u President Bah Donboklang Kharlyngdoh ka la kner ki jingiarap sha ki nongniah kali kamai Auto Motphran bad Polo (MARODA & PARODA) da 27 byrni u khaw, 5 byrni u Piat, 2byrni u Dai bad 7 synduk ka Umphniang.
U Bah Donboklang u la ong kum ka kynhun ngim lah khlem da ithuh kyrpang ia u Synniang uba phi ki Driver phi la noh Synniang ia u paitbah, ha ka por bym pat don ka khlam Covid 19, phi la pynpoi ia ki khynnah pule sha ki skul, ia ki nongbylla sha jaka trei, ia ki nongtrei sorkar sha ki ophis, ia kiba pang sha ki Hospital bad kumta ter ter.
Kumta kum ka jingithuh kyrpang ia ki kam kiba phi la leh, ha ki por ba ladep, bad khamtam haba ngi iohi ba kane ka khlam ka la lyngshop ia ka Ri jong ngi, ngi sngewthuh ba ka la ktah ia ka kamai kajih jong phi, kumta kum ka kynhun da ka jingieit ngi wan sha phi bad wanrah kine ki marbam kiba long ki jingiarap kiba khyndiat eh sha phi ki Association. Ngi kyrmen ba phin pdiang ia kine ki jingiarap kiba rit ki jong ngi,da ka mynsiem kaba Kmen.
U la ong shuh shuh kum ka kynhun, ngi la leit sha man ki jaka, ban kner ki jingiarap haba ki para ri ki don ha ka jingkyrduh bam, teng teng shiteng miet teng teng dang step phyrngap la hap pynpoi bam sha ki. Te kum kiba ngeit ia u Nongbuh Nongthaw to kynmaw lem ia ngi ha ki jingduwai ba u Blei un ker un da bad ba un pynkynriah noh shisyndon ia kane ka khlam Covid 19 na ka Ri bad na shityllup ka Pyrthei.
Katkum ka jingiathuh jong ki nongialam, kitei ki Association ki Dkhot baroh jong ka MARODA ki long 125 ngut bad PARODA 45 ngut ki ban sa ioh ia ka Jingiarap da kitei ki marbam.
U Bah Thrangbor Sawian Secretary ka MARODA haba jingkren u la pynpaw ka jingsngewnguh ia u Kynrad Nongbuh Nongthaw ba u la phah ia ka HYC ba kan kner ia ki kti basbun na bynta ka Association, u la ong kum ki Drivers ngi la kynduh jingeh shisha , namar ki kali jong ngi kim ioh iaid shuh ha surok, namar ka lockdown, haba bynrap ia ka jingkren u Secretary na ka Liang u President MARODA, Bah Evandul Marbaniang uba pyniaid ia ka jingialang u la ong, nalor ka kyrduh bam namar ka jingbym ioh kamai, ngi ki driver ngin sa kynduh sa kawei ka jingeh lada ka sorkar lyngba ka tnad transport kam map, ia ki khajna jong ki kali jong ngi.
U Bah Kitbok Pyngrope Assistant Secretary ka PARODA u la pynpaw ka jingsngewnguh bad aikhublei kaba kyrpang ia ka HYC Mawlai circle kaba la kynmaw ia ka Association jong ki, ha kum kine ki sngi ba ngi mad ia ka Lockdown.
Ha kane ka jingialang ba lyngkot ba la pynlong hajan ka ophis MARODA la ioh ka jingkren pdiang bad duwai na I Bah Sairos Diengdoh Finance secretary MARODA, ka jingaikhublei na u Nevalshal Nonglang bad ka jingduwai sngewnguh iu Blei Nongbuh Nongthaw na u Bah Donald W Disiar.
Kane ka long katkum ka kyrwoh ba la phah da u Assistant General secretary Mawlai circle Bah Pynshai Lyngkhoi.
