01-Aug-2021
Press release
KYNTU KA HYC MAWLAI CIRCLE BAN NYM PYNBOR AI VACCINE IA KI PAITBAH.
Ka HYC Mawlai circle hadien ka jingujor ba la ioh na ki paitbah kiba bun, mynta ka Sngi hapoh ka jingialam u Bashan Lyngdoh Mawnai General secretary ka la mih shakhmat ban kren lyngba ki lad pathai khubor sha ki Dorbar shnong, ki ophis Sorkar, ki Nongaikam ai jam ha ki bynta bapher bapher, haduh ki company shimet ba Kim dei ban pynbor shaphang ka jing ai Tika (Vaccine) ia ki paitbah kiba long ki nongshong dukan ne ki nong bylla kiba trei hapoh jong ki.
Ka seng , ka pynpaw ka jing sngewkmen hadien ba ngi la iohi, ba ha u bnai Jylliew, ka iing bishar ba don burom Meghalaya High Court ka la pynbna ba ka jingai Tika ne Covid Vaccine kam dei ban long Mandatory hynrei kadei ban long Advisory. Kumta, mynta ka Sngi, ngi pynkynmaw biang ia ki nongshong shnong ka Jylla ba ngin burom ia katei ka jingpynbna ne ka hukum jong ka Meghalaya High Court.
Ngi la ioh jingtip ba ki don ki briew, kiba la shah pynbor ai Tika, mynta ki la ioh pang ne shitom, bad kata ka jingpang kadei ka jingpang ha ki jingmut jingpyrkhat. Mano ban sumar ia ki, u la buh jingkylli ?
Kumta ka seng ka kren shai ba ki paitbah kiba kwah ban ai Tika, ai ba kin leit da ka mon laitluid jong lade, bad kito ki bym kwah, ai ba kin sngewthuh hi da lade ia lade.
Ka seng ha kane ka Sngi ka la pynpaw ruh ka jingaikhublei ia baroh ki Frontline workers naduh ki Doctors, ki Nurses ki ASHA, ki Covid Management committee, ki Dorbar shnong, ki Seng Samla, ki Seng Kynthei , ki Sengbhalang haduh ki Riew shimet kiba la ia mih lang ban iakhun ia kane ka khlam Covid 19.
Ha ka juh ka por ka seng ka kyntu ia ka Health Department lyngba ka ophis u DHS ba ha ka por ba phi leit ban ai Vaccine sha man ki Dorbar shnong, sngewbha ban phah ryngkat ki Doctors kiban peit shwa (check up)ia ka koit ka khiah jong u ne ka paitbah, bad hadien ba la thikna ba ki don hapdeng ka koit ka khiah, sa shah ia ki ban ai injection, namar kumba long kiba bun ki briew kiba la kit lypa ka jingpang ha ka met, tang hadien ba la ai Tika, ki kylla shitom arshah bad don ruh napdeng jong ki, ki khlad noh.
Ka seng ha kane ka Sngi ka la bteng biang ia ka jingiakhun COVID 19 da kaba Sam ia ki hand sanitizer sha baroh ki nongdie dukan jong ka Mawlai Nongkwar petrol pump kumjuh ruh ka thain Stand Bus Mawlai Mawdatbaki.
Kane ka long katkum ka kyrwoh ba la pyllait da u Organising secretary HYC Mawlai circle Shanbor Marwein.
