25-Jun-2021
IAI BTENG NOH JINGIARAP KA HYC HA KINE KI SNGI KHANGDAM
Ka HYC Mawlai circle mynta ka nohphai Sngi 25th Jylliew 2021hapoh ka jingialam u President Mawlai circle Bah Donboklang Kharlyngdoh bad Assistant General secretary Bah Pynshai Lyngkhoi ki la hiar sha ka shnong Umphrew bad Umryjah ban kner jingiarap sha ki katto katne ngut ki longiing kiba la mad jingeh namar ka Lockdown.
Ki jingiarap ba ka seng ka la noh ha kine ki artylli ki shnong ha Umphrew 20 iing bad Umrynjah 30 iing ki long da u khaw, Phan bad u Dai.
Ha baroh artylli ki jingialang la pdiang sngewbha ia ki nongialam ka HYC da ki Rangbah Shnong.
Ha Umphrew la pynlong ka jingialang ba lyngkot ha Phyllaw iing skul ha kaba la pyniaid ia ka jingialang da u Rangbah shnong Bah Dikon Sohshang bad ki jingkren ba lyngkot na u Secretary shnong Bah Fanwell Langstieh bad Bah Donboklang Kharlyngdoh ha ka jingdon ryngkat ki nongialam shnong bad ki 20 tylli ki longiing.
Ha Umrynjah la pynlong ka jingialang ha phyllaw ka iing shnong, ha kaba la pyniaid da u Bah Ophy Suting Publicity secretary HYC Mawlai circle bad la ioh jingkren na u Rangbah shnong Bah Markus Warjri bad Bah Donboklang Kharlyngdoh President HYC.
La ioh ka jingkren na kitei ki nongkitkam shnong baroh artylli, ha kaba ki la pynpaw ka jingsngewnguh ia ka HYC Mawlai circle kaba la kloi ban theh ia kine ki jingiarap sha ki nongshong shnong jong ki, ki la kyrkhu kyrdoh bad ai mynsiem ia ka seng ba kan nang kiew shaphrang ha ki Liang baroh, khamtam ka jingshakri ia ka Ri bad ka Jaidbynriew.
U Bah Donboklang Kharlyngdoh haba ai jingkren, u la ong ba dei ka mynsiem ieit para briew la pynlong ia ka HYC ba kan wan iuh kjat bad wan iarap da kine ki marbam hapoh kine ki shnong ki jong phi. U la ong kum ki nongialam sengbhalang, lada ngim iarap ha kum kane ka por te lano pat ? U la pyrto ia ki nongkitkam shnong kiba la duh thiah duh dem ban iakhun pyrshah ia kane ka khlam Covid 19 naduh mynshem snem. U ong shuh shuh ba kum kiba ngeit to ngin nym klet ban khot kyrpad iu Nongbuh Nongthaw khnang ba un kdat bad pyllait noh shi syndon ia kane ka khlam na sla jong ka Pyrthei, khnang ba ngin ioh ban im ban trei ban ktah kumba long ha ki khyndiat snem ba ladep.
La pynkut ia kitei ki artylli ki jingialang da ki jingduwai na u Bah Topaz stone Shangpliang u nongialam ka HYC Mawlai circle.
Kane ka long katkum ka kyrwoh ba la phah da u Bah Ophy Suting Publicity secretary HYC Mawlai circle.