24-Jun-2021
Ka HYC Mawlai circle hapoh ka jingialam u President Bah Donboklang Kharlyngdoh ka la bteng ban kner ki kti jingiarap na bynta ki briew kiba la mad jingeh lyngba ka Khangdam ne lockdown ha ki shnong ka Mawlai.
Ha kane ka Sngi ryngkat ka HYC Mawlai Nonglum Unit hapoh ka jingialam u Bah Pynshai Lyngkhoi, ka la kner jingiarap ia ka Mawlai Taxi Driver Owner Association ha jingsakhi lang u Assistant Rangbah shnong ka Nonglum Bah M.War kaba la pynlong ha Iew Nonglum.
Hadien katei ka jingialang, ki la hiar sha ka shnong Umjajew ban kner jingiarap sha kumba 20 tylli ki longiing kumjuh ruh da ki jingbam khyllung , ia kaba ki la ai lyngba i ASHA jong ka shnong.
Haba ai jingkren ba lyngkot ha kitei ki jingialang naduh u President ka Mawlai Taxi Drivers & Owner Association Bah William Warjri, u Assistant Rangbah Shnong Mawlai Nonglum Bah JS.War haduh u Rangbah shnong ka Mawlai Umjajew Bah M.Majaw ki la pyrto ia ka seng kaba la lah ban kner kine ki jingiarap kum u khaw, Phan, Piat ki dud bad biscuits khynnah, ha kum kine ki por, khamtam ba ka seng ka la kynmaw kyrpang ia ki.
Ki la ai ka jingkyrkhu kyrdoh ruh ia ka HYC ba kan nang kiew shaphrang ha ki Liang baroh ki jingshakri jong ka ia ka Ri bad Jaidbynriew.
Ha baroh kitei ki jingialang ka la don ka jingduwai ba kyrpang na ki Dorbar shnong, na bynta ka Ri bad Jaidbynriew ba la ialam da u Bah Topaz Shangpliang